ცენტრი, როგორც პარტნიორი მონაწილეობს საერთაშორისო პროექტში (PORTUS. Black Sea Cultural Port in Action), რომელიც 2017 წელს წარდგენილ იქნა, ევრო-კავშირის შავი ზღვის აუზის თანამშრომლობის პროგრამაში, წამყვანი ორგანიზაციაა: European Centre of Byzantine and Postbyzantine Monuments (EKBMM) , თესალონიკი, საბერძნეთი. დამტკიცების შემთხვევაში პროექტის განხორციელება დაიწყება2018 წ. ეს პროექტი არის ლოგიკური გაგრძელება 2012-2015 წლებში განხორციელებული ორი საერთაშორისო პროექტის : “OLKAS.From the Aegean to the Black Sea – Medieval Ports in the Maritime Routs of the East” და “LIMEN. Cultural Ports from Aegean to the Black Sea”, რომელთა განხორციელებაში გ.ჩუბინაშვილის ცენტრი მონაწილეობდა როგორც პარტნიორი.

2014 წლის 6 ნოემბერს მსოფლიო ბანკის თბილისის წარმომადგენლობის თხოვნით ცენტრის დირექტორი მარიამ დიდებულიძე შეხვდა მსოფლიო ბანკის ვიცე-პრეზიდენტს ქ-ნ ლორა ტაქს. თბილისის მერის ბ-ნ ნარმანიას და საკრებულოს თავმჯდომარის გ. ალიბეგაშვილთან ერთად მ. დიდებულიძემ მონაწილეობა მიიღო თბილისის ღირსშესანიშნაობების დათვალიერებაში და დაწვრილებით წარუდგინა ქ-ნ ტაქს 1997-2002 წლებში ძველ თბილისში მსოფლიო ბანკის მიერ განხორციელებული პროექტები.

გიორგი ჩუბინაშვილის სახელობის ქართული ხელოვნების ისტორიისა და ძეგლთა დაცვის კვლევის ეროვნული ცენტრი ევროკავშირის შავი ზღვის აუზის თანამშრობლობის პროგრამის ფარგლებში დაწყებული პროექტის „LIMEN: კულტურული პორტები ეგეოსიდან შავ ზღვამდე“ პარტნიორია.

პროექტის ორგანიზატორია ბიზანტიური და პოსტ-ბიზანტიური ძეგლების ევროპული ცენტრი (EKBMM, თესალონიკი); პროექტის პარტნიორები არიან: სტამბულისა და კოჩის უნივერსიტეტები (თურქეთი), კავალას მუნიციპალიტეტი (საბერძნეთი); კონსტანცას ნაციონალური ისტორიისა და არქეოლოგიის მუზეუმი (რუმინეთი); ოდესის მუნიციპალიტეტის კულტურისა და ტურიზმის დეპარტამენტი (უკრაინა); ვარნას მუნიციპალიტეტი (ბულგარეთი). პროექტის მხარდამჭერები არიან: შავი ზღვის ეკონომიკური თანამშრომლობის ორგანიზაცია (BSEC), შავი და აზოვის ზღვების პორტების ასოციაცია (BASPA ), შავი ზღვის საერთაშორისო კლუბი (IBSC).

პროექტის მიზანია შავი ზღვის რეგიონში კულტურული ტურიზმის განვითარება და „კულტურის ევროპული დედაქალაქის“ გამოცდილების გამოყენებით ახალი ინსტიტუციის: „შავი ზღვის კულტურული პორტის“ დაფუძნება. ინსტიტუციის მიზანია შავი ზღვის აუზის ქალაქი-პორტების მემკვიდრეობისა და სპეციფიკური ტურისტული პროდუქტების პოპულარიზაცია; ქალაქი-პორტების მდგრადი და თანასწორი თანამშრომლობის ეკონომიკური და კულტურული პლატფორმის მომზადება.

საწყის ეტაპზე პროექტი გულისხმობს პარტნიორ ქვეყნებში ადგილობივი ქსელების ჩამოყალიბებას.

ერთობლივი ქართულ-იაპონური კვლევითი პროექტი

2012 წელს გაგრძელდა 2010-2011 წლებში დაწყებული მუშაობა ერთობლივ ქართულ-იაპონურ კვლევით პროექტზე, რომელშიც გ. ჩუბინაშვილის სახ. ეროვნული ცენტრი თანამშრომლობს ტოკიოს ტექნოლოგიის ინსტიტუტთან და რომლის მიზანია შუა საუკუნის ქართული არქიტექტურის ძეგლების სამშენებლო ტექნიკის, სტრუქტურული სიმყარისა და სეისმომედეგობის შესწავლა უახლესი ტექნიკური საშუალებების გამოყენებით. პროექტს ხელმძღვანელობს ტოკიოს ტექნოლოგიის ინსტიტუტის ნაშენი გარემოს დეპარტამენტის გამგე შირო სასანო. გ. ჩუბინაშვილის სახ. ეროვნული ცენტრის მხრიდან პროექტს კოორდინირებას უწევს ძველი ხელოვნების განყოფილების გამგე დავით ხოშტარია.

2012 წლის 26 ივნისიდან 4 ივლისამდე ჩატარდა კვლევის მესამე ეტაპის სამუშაოები, რომლებიც ითვალისწინებდა ფოტოგრამეტრიულ ანალიზს და შენობების სეისმომედეგობის შემოწმებას სენსორების მეშვეობით. ერთობლივ კვლევით ჯგუფში გ. ჩუბინაშვილის სახ. ეროვნული ცენტრის მხრიდან მონაწილეობდნენ: დავით ჩიხლაძე, მარიამ გაბაშვილი, გიორგი პატაშური, ნინო ციციშვილი, ნატო ჩიტიშვილი, თამარ დადიანი, ირინა მანია და ეთერ ედიშერაშვილი. ჯგუფმა იმუშავა მცხეთაში, წრომში, უბისაში, სამთავისში, წინარეხში, ყინცვისში, შატილსა და მუცოში.

2010 წელს ტოკიოს ტექნოლოგიის ინსტიტუტმა და გ. ჩუბინაშვილის სახ. ეროვნულმა ცენტრმა წამოიწყეს ერთობლივი კვლევითი პროექტი, რომლის მიზანია შუა საუკუნეების ქართული ეკლესიების ფიზიკური მდგომარეობის შესწავლა.

2011 წლის 6-დან 20 სექტემბრამდე ჩატარდა პროექტის მეორე ეტაპის სამუშაოები. იაპონელი მეცნიერები შირო სასანო (პროექტის ხელმძღვანელი), იასუჰიტო ფუჯიტა, საჩიკო ჰატორი, ნორიო იოშიმოტო და რიკა ფუჯიტა საქართველოში ჩამოვიდნენ საველე კვლევის ჩასატარებლად და ტექნიკური მონაცემების შესაგროვებლად.  საველე სამუშაოებში, რომლებიც მოიცავდა შენობების აზომვას, სინჯების აღებას, ფოტოგადაღებას და ფოტოგრამეტრიულ ანალიზს, მონაწილეობდა გ. ჩუბინაშვილის სახ. ეროვნული ცენტრის ექვსი თანამშრომელი: მარიამ გაბაშვილი, გიორგი პატაშური, ნათია ნაცვლიშვილი, მანონ ლილუაშვილი, ირინა მანია და ეთერ ედიშერაშვილი. ქართული მხრიდან პროექტის კოორდინატორია ძველი ხელოვნების განყოფილების გამგე დავით ხოშტარია.

ერთობლივმა ჯგუფმა იმუშავა ქუთაისში, გელათში, მარტვილში, უბისაში, კაცხში, ქორეთში, ნიკორწმინდაში, ტიმოთესუბანში, წუნდაში, ზედა ვარძიაში, წრომში, სამთავისში, ურბნისში, ყინწვისში, სამწევრისსა და ატენში.

30 ივლისს, 13.00 საათზე თბილისის სახელმწიფო სამხატვრო აკადემია აფორმებს ურთიერთთანამშრომლობის მემორანდუმს გ. ჩუბინაშვილის სახელობის ქართული ხელოვნების ისტორიისა და ძეგლთა დაცვის კვლევის ეროვნულ ცენტრთან.

ურთიერთთანამშრომლობა ითვალისწინებს ერთობლივ მუშაობას საგანმანათლებლო და სამეცნიერო სფეროებთან დაკავშირებული ყველა მიმართულებით:

1. ერთობლივი სამეცნიერო-კვლევითი პროექტების შემუშავება;
2. ცენტრის აქტიური მონაწილეობა აკადემიის ხელოვნების ისტორიისა და თეორიის მიმართულების საგანმანათლებლო პროგრამების შექმნაში;
3. აკადემიის ხელოვნების ისტორიისა და თეორიის მიმართულების სტუდენტების პრაქტიკის ორგანიზება ცენტრის ბაზაზე;
4. ერთობლივი სამეცნიერო კონფერენციების ორგანიზება.

ჩარჩო შეთანხმება ერთობლივი საქმიანობისა და ურთიერთთანამშრომლობის შესახებ ა. ქუთათელაძის სახელობის თბილისის სახელმწიფო სამხატვრო აკადემიასა და გ.ჩუბინაშვილის სახელობის ქართული ხელოვნების ისტორიისა და ძეგლთა დაცვის კვლევის ეროვნულ ცენტრს შორის

19 აპრილს 2010 წელს შედგა თანამშრომლობის მემორანდუმი საქართველოს სამეცნიერო, საგანმანათლებლო, კულტურული, საჯარო და საზოგადოებრივ ინსტიტუციებს შორის, რათა ხელი შეეწყოს ქვეყანაში გლობალური განზომილების მქონე ინფორმაციის მართვისა და კვლევის განვითარებას, ამ სფეროში თანამედროვე კომპეტენციის მქონე ადამიანური რესურსების უზრუნველყოფას.

2009 წელს გიორგი ჩუბინაშვილის სახ. ქართული ხელოვნების ისტორიისა და ძეგლთა დაცვის კვლევის ეროვნული ცენტრი და ტოკიოს ტექნოლოგიის ინსტიტუტი შეთანხმდნენ ოთხწლიან თანამშრომლობაზე. ამ ოთხ წელიწადში უნდა განხორციელდეს კვლევითი პროექტი, რომლის მიზანია ქართული ეკლესიების ფიზიკური მდგომარეობის შესწავლა ტექნიკის ახალი საშუალებების გამოყენებით. იაპონური მხარე უზრუნველყოფს პროექტის მონაწილეებს უახლესი ტექნიკური აღჭურვილობით.

2010 წლის სექტემბერში დაიწყო პროექტის განხორციელების პირველი ეტაპი, რომელიც გულისხმობს საეკლესიო შენობების აზომვას და ფოტოგრამეტრიულ ანალიზს. საქართველოში ჩამოვიდა იაპონელ მეცნიერთა ხუთკაციანი ჯგუფი პროფესორ შირო სასანოს ხელმძღვანელობით. ქართველ კოლეგებთან ერთად მათ ჩაატარეს სამუშაოები თბილისში, ქვემო ქართლში, შიდა ქართლში და კახეთში, რის შედეგადაც გამოკვლეული იქნა მეტეხის, ანჩისხატის შიომღვიმის ბოლნისის სიონის, წინარეხის, მანგლისის, ძველი შუამთის, ნეკრესის, ალავერდის, ნინოწმინდის, გურჯაანის ეკლესიები. სამუშაოების ბოლო ორი დღე დაეთმობა მცხეთას.

დაგეგმილი კვლევის შედეგები საშუალებას მოგვცემს სრულად გამოვავლინოთ შენობათა დაზიანებები, როგორიცაა ბზარები, საძირკვლების ჯდენა, ქვის გამოფიტვა და სხვა; დავადგინოთ სეისმომედეგობის დონე და, შესაბამისად, განვსაზღვროთ შესაძლო რისკები. ამდენად, მათ დიდი მნიშვნელობა აქვს ძველი ეკლესიების დაცვისა და რესტავრაციის ღონისძიებების შესამუშავებლად.