2014 წლის 27 მაისს, საქართველოს პრეზიდენტის სასახლეში გაიმართა გამოფენა „ქართული ფრესკა – აღდგომა“.

გამოფენაზე წარმოდგენილი იყო ქართველი მხატვრების: მერაბ აბრამიშვილისა და ირაკლი ფარჯიანის რელიგიურ თემატიკაზე შესრულებული ფერწერული ნამუშევრები და გიორგი ჩუბინაშვილის სახ. ქართული ხელოვნების ისტორიისა და ძეგლთა დაცვის ეროვნული კვლევის ცენტრის ფოტო-ლაბორატორიის საილუსტრაციო მასალა, მაღალი ხარისხის ფოტოები – ქართული საეკლესიო მონუმენტური მხატვრობის, ხატების, მინიატურებისა  და ოქრომჭედლობის ნიმუშების ამსახველი გამოსახულებები: გელათის ღვთისმშობლისა და წმიდა გიორგის ტაძრის,  ყინცვისის, კაცხის ტაძართა, დავით-გარეჯის მონასრტის ფრესკების, წყაროსთავის ოთხთავის, იშხნის საწინამძღვრო ჯვრისა და ა.შ.

გამოფენაზე მიწვეული იყო საქართველოს კათოლიკოს პატრიარქი, უწმინდესი და უნეტერესი  ილია II და საზოგადოების სხვადასხვა სფეროს წარმომადგენლები.

ცნობილი ქართველი მეცნიერისა და  კერამიკოსის ზაქარია მაისურაძის 100 წლისთავისადმი მიძღვნილი გამოფენა და კონფერენცია

გიორგი ჩუბინაშვილის სახელობის ქართული ხელოვნების ისტორიისა და ძეგლთა დაცვის კვლევის ეროვნული ცენტრში გაიმართება ცნობილი ქართველი მეცნიერისა და  მხატვრის, ქართული კერამიკული ხელოვნების თვალსაჩინო წარმომადგენლის ზაქარია მაისურაძის 100 წლისთავისადმი მიძღვნილი გამოფენა და კონფერენცია. ზაქარია მაისურადძე მიეკუთვნება ქართული ხელოვნების ისტორიის ინსტიტუტის დამფუძნებელთა რიცხვს.

მისი პედაგოგიური მუშაობა,  სამეცნიერო შრომები შუა საუკუნეების ქართული კერამიკული ხელოვნების თაობაზე, ისევე როგორც მისი მოღვაწეობა ამ დარგის ტექნოლოგიურ-პრაქტიკული პრობლემების კვლევაში საფუძვლად დაედო ქართული კერამიკის განვითარებას ახალ დროში.
გამოფენა გახსნა 28 აპრილს 17:00 საათზე.

წარმოდგენილი იქნა ზაქარია მაისურაძის კერამიკული  პანოები,  ნაკეთობანი და შუა საუკუნეების პლასტიკიის ნაწარმოებების ასლები.

ზაქარია მაისურაძისადმი მიძღვნილი სამეცნიერო კონფერენცია  გაიმართა 29 აპრილს (11:00-16:00 სთ.) და დაეთმო ქართული თანამედროვე პროფესიული კერამიკის პრობლემებს.

26 დეკემბერს, 17:00-ზე

საახალწლო გამოფენაზე წარმოდგენილი იყო:
მარიამ გაჩეჩილაძის, მარიამ დიდებულიძის, ცისია კილაძის, დალი ლებანიძის, სამსონ ლეჟავას, მაია მანიას, დალი მუხაძის, ასმათ ოქროპირიძის, მზია ჩიხრაძის, გიორგი ხოშტარიას ნამუშევრები

26 ნოემბერს, 17. 00 საათზე, გიორგი ჩუბინაშვილის სახელობის ქართული ხელოვნების ისტორიისა და ძეგლთა დაცვის კვლევის ეროვნული ცენტრის გალერეაში გაიხსნა საიუბილეო ფოტოგამოფენა, რომელიც მიეძღვნა სერგო ქობულაძის სახელობის ქართული ხელოვნების  ძეგლთა ფოტოფიქსაციის ლაბორატორიის დაარსებიდან 40 წლისთავს.
გამოფენაზე წარმოდგენილია ლაბორატორიის სლაიდოთეკაში დაცული, კულტურული მემკვიდრეობის  საუკეთესო  ნიმუშთა ფოტოები და თემატური ბანერები, რომლებზედაც წარმოდგენილია ფოტოფიქსაციის ლაბორატორიის მიერ თავისი არსებობის მანძილზე განხორციელებული ექსპედიციების ამსახველი შავ – თეთრი ფოტოების რეტროსპექტური რიგი, აგრეთვე ლაბორატორიის დამაარსებელთა და ცნობილ ფოტოხელოვანთა პორტრეტები.
გამოფენა გაგრძელდება ერთი კვირა. ექსპოზიციის დათვალიერების მსურველთათვის შესვლა თავისუფალია. გალერეა ღიაა 12.00 საათიდან – 18. 00 საათამდე.

გიორგი ჩუბინაშვილის სახელობის ქართული ხელოვნების ისტორიისა და ძეგლთა დაცვის ეროვნული ცენტრმა  საქართველოს კულტურისა და ძეგლთა დაცვის სამინისტროს და თბილისის სახელმწიფო სამხატვრო აკადემიის მხარდაჭერით განახორციელა პროექტი: “რენე შმერლინგის ექსლიბრისის უნიკალური კოლექციის გამოფენა (XIX ს. – XX ს.-ის 30 წწ.) და სადისკუსიო მრგვალი მაგიდა  ქართული გრაფიკული ხელოვნების პრობლემებზე” (2013 წლის 15-30 ოქტომბერი).

ღონისძიება მიეძღვნა ცნობილი გრაფიკოსი-მხატვრების – ლადო გრიგოლიასა და ნიკოლოზ ჩერნიშკოვის დაბადებიდან 110 წლისთავის საიუბილეო თარიღს.

2013 წლის 15 ოქტომბერს, გ. ჩუბინაშვილის ცენტრის საგამოფენო დარბაზში გაიმართა გამოფენა, სადაც წარმოდგენილი იყო ამ ორგანიზაციის არქივში დაცული, ცნობილი ქართველი მეცნიერის, რენე შმერლინგის ექსლიბრისის კოლექცია, რომელიც მოიცავს ორ ასეულზე მეტ ქართული, სომხური, რუსული და ევროპული ექსლიბრისის საუკეთესო, უნიკალურ ნიმუშებს – XIXს-დან XXს-ის 30-ანი წლების ჩათვლით.

ექსპოზიციაში ასევე განთავსდა ლადო გრიგოლიას შრიფტების რამდენიმე გარნიტური, ქ-ნი რენეს არქივში დაცული ნ. ჩერნიშკოვის მინიატურული და დაზგური გრავიურის ნიმუშები და სპეციალურად ამ ღონისძიებისთვის თბილისის სახელმწიფო სამხატვრო აკადემიის გრაფიკის ფაკულტეტის სტუდენტების მიერ შესრულებული წიგნის ნიშნები (პედაგოგები: ლორეტა შენგელია-აბაშიძე, გოგი წერეთელი).
ამავე ღონისძიების ფარგლებში გაიმართა კონფერენცია (16 ოქტომბერი).
გიორგი ჩუბინაშვილის სახელობის ცენტრის მთავარმა მეცნიერ თანამშრომელმა, ხელოვნებათმცოდნეობის დოქტორმა, პროფესორმა დიმიტრი თუმანიშვილმა ისაუბრა – რენე შმერლინგზე, როგორც მეცნიერზე, მის ფართო ინტერესებზე და ქართული კულტურის ისტორიაში შეტანილ ფასდაუდებელ ღვაწლზე.
პროექტის ერთ-ერთმა მონაწილემ, ამავე ცენტრის უფროსმა მეცნიერ თანამშრომელმა, ხელოვნებათმცოდნეობის დოქტორმა მარინა მეძმარიაშვილმა ისაუბრა ნიკოლოზ ჩერნიშკოვის შემოქმედებაზე, საზოგადოებას გააცნო, როგორც რენე შმერლინგის კოლექციაში დაცული მხატვრის ნამუშევრები, ასევე ყველა ის  მასალა რომელთა მოძიებაც მოხერხდა არსებულ ეტაპზე.

საქართველოს სახალხო მხატვრის, რუსთაველის პრემიის ლაურეატის, ლადო გრიგოლიას შემოქმედების შესახებ ისაუბრა, მხატვრის მემკვიდრემ, ქალბატონმა მერი ჯაფარიძემ.

პროექტის ხელმძღვანელმა, გ. ჩუბინაშვილის ცენტრის უფროსმა მეცნიერ თანამშრომელმა, ხელოვნებათმცოდნეობის დოქტორმა მარიამ გაჩეჩილაძემ ისაუბრა ზოგადად ექსლიბრისის ხელოვნების წარმოშობისა და განვითარების ისტორიაზე, ამ ჭრილში განიხილა რენე შმერლინგის კოლექციის უნიკალური ექსპონატები და მიმოიხილა  ქართული ექსლიბრისის განვითარების ისტორია წარმოშობიდან (XVIII ს.) დღევანდელ დღემდე.

დასასრულს შედგა დისკუსია, რომელშიც მონაწილეობა მიიღეს გრაფიკოსმა მხატვრებმა, სტუდენტებმა და დამსწრე საზოგადოების წარმომადგენლებმა.

დისკუსიის საგანს შეადგენდა თანამედროვე ქართულ წიგნის გრაფიკაში წარმოქმნილი პრობლემები: ბეჭდური, კომპიუტერული და მხატვრული შრიფტის, ორნამენტის და ექსლიბრისის განვითარებაში არსებული მწვავე, პრობლემატური საკითხები. წარიმართა მსჯელობა მათი გადაჭრის გზების საძიებლად და დაისახა მომავალი ღონისძიებების გეგმები.

30-31 ივლისს ცენტრის საგამოფენო დარბაზში გაიმართა პირველი გამოფენა. ფოტო-გამოფენა ეძღვნებოდა აფხაზეთის კულტურული მემკვიდრეობის ძეგლების ამჟამინდელ მდგომარეობას.

გამოფენა ორგანიზებულ იქნა ახალგაზრდული ორგანიზაციის “ახალგაზრდები ხელოვნებისთვის” მიერ. ორგანიზატორი- ლევან ამირანაშვილი.

გამოფენას ესწრებოდნენ კულტურის სამინისტროს წარმომადგენელი ბესიკ მაცაბერიძე, ამერიკის შეერტებული შტატების საელჩოს კულტურის ატაშე ქ-ნ იაროსლავა პეტროვა, ცენტრის სამეცნიერო საბჭოს თავმჯდომარე დიმიტრი თუმანიშვილი, ცენტრის თანამშრომლები, თბილისის სამხატვრო აკადემიის წარმომადგენლები და საზოგადოების წარმომადგენლები.

2013 წლის 23-26 მაისს გაიმართა (ექსპო ჯორჯიას მე-52 პავილიონი)
თბილისის წიგნის XV საერთაშორისო ფესტივალი.
გ. ჩუბინაშვილის სახელობის ქართული ხელოვნების ისტორიისა და ძეგლთა დაცვის
კვლევის ეროვნულმა ცენტრმა წარმოადგინა მის მიერ  ბოლო წლებში გამოცემული წიგნები.

რენე შმერლინგის ექსლიბრისის უნიკალური კოლექციის გამოფენა (XIX ს.- XX ს. -ის 30 წწ.)

პროექტის ხელმძღვანელი: მარიამ გაჩეჩილაძე

შემსრულებელთა ჯგუფი: მარინა მეძმარიაშვილი, თამარ ბელაშვილი, გიორგი პაპაშვილი

საქართველოს კულტურისა და  ძეგლთა დაცვის სამინისტრო

გიორგი ჩუბინაშვილის სახელობის ქართული ხელოვნების ისტორიისა და ძეგლთა დაცვის კვლევის ეროვნული ცენტრი

თბილისი 2013